Wala akong magawa. Di naman porke wala akong magawa eh nagba blag na ako. Paminsan minsan kelangan ko din masikatan ng araw. Bukod sa kelangan ko ng vitamin D, kelangan ko din makita ang labas nitong selda kong 8 x 8. Kaya eto ako, pasyal pasyal kahit puyat.

Kung ang mga chikabeybs, naglalaway sa mga sapatos at handbags, kaming mga kelots, kung hindi sa home depot ang pasyal eh sa mga tindahan ng mga gadgets. Oo, kasi nasa DNA namin yun (as in Di Namin Alam), ang maging natural na mahilig sa mga kung anu-anong anik-aniks at mga pang mga bagay na pwedeng pangkali-kalikot. At dahil wala naman akong Wii o kaya PS3 o kaya ay Xbox o GameCube na pinagkaka-abalahan maliban sa aking brick game na baon ko pa galing Quiapo, naisipan kong dumaan sa bilihan ng mga games.

Peborit ko kasi maglaro ng Red Alert. Yun namang red alert ko, iniwan ko na sa LA nung maglipat-bahay ako. Nami-miss ko na din kasi si Tanya. Me nakita akong bagong labas na Red Alert 3. Gustong gusto ko na sana syang kunin kaso nag-tatlong isip ako kasi baka pag niload ko sya sa laptop ko, di na kayanin ng powers nun sa mga blogs ko pa lang.

Palibhasa, sanay na lang ako sa aking brickgame at rubik’s cube, medyo nalula ako sa mga games. Parang gusto ko bilhin lahat. Kaso parang mas gusto ko pa rin yung mga dating mga gaming stations na kopong kopong pa. Kahit medyo ala dot matrix lang yung graphics, okey na rin. Mura pa. Eh sa mga games ngayon, bala pa lang, mapapamura ka na sa mahal. Kung di nga lang mga hirit ng mga inakay ko, di ako bibili. Kung ako lang, kuntento na ko sa jack en poy at tic tac toe.

Naalala ko tuloy yung Atari nung kapitbahay ko noon. Bihira lang ang meron nun noon, mayayaman lang. Buti na lang lumabas yung Family Computer, yun mura mura lang. Pati yung bala me mabibili ka sa Raon. Dun ko nga lang nakilala si Pareng Mario eh. Galing, naging expert ako pagkakalikot ng tubo. Me lumabas ding PolyStation, sempre gawang Pinas kaya gaya gaya lang. Pati yung graphics, medyo despalinghado. Kelangan din sisipain mo ng konti para gumana.

Kung bakit kasi nauso pa ang ganitong hayteks hayteks. Ke sarap nung naglalaro ka lang ng bahay-bahayan eh.