Dati rati, kapag bagong dating ka, inuman na!

Kahit saang lupalop ka pa nanggaling, sa iskul, sa probinsiya, sa manela, sa munti o ospital, basta bagong dating ka, kelangan me pa-welkam na inuman palagi. Sa totoo lang, para lang magkaron ng dahilan para mag-celebrate kuno. Inuman lang naman talaga ang gusto. Mamam, tagay, laklak, tungga, barik.

Hindi naman talaga tayo sugapa sa alak, konti lang. Masayahin lang talaga tayo. Gusto laging sama-sama, laging maingay, laging masaya. Kahit lumuluwa na bituka mo kakasuka, o di ka na makagapang pauwi, okey lang. Kahit pa nga di mo na rin naman natatandaan kung pano ka nakauwi, o kung ano pang mga kabulastugan ang pinaggagagawa mo kagabi, oks pa rin.

Tulad ng maraming bagay, maaga din akong nag-umpisa uminom. Nasa elementary palang ako, nag-uumpisa na ko uminom ng punch at beer. Minsan pa nga, ipapalagay ko pa sa plastik ung beer me kasamang straw para kunyari sopdrink. Ewan ko, basta alam ko nun, astig kapag umiinom.

Ngayon, taon na ata akong di nakakatikim ng alak. Di naman yun ang nami-miss ko. Nami-miss ko lang yung kabulastugan na kasama ng mga inuman. Mga kwentuhang wala namang kawawaan.

Ang isang napansin ko dito sa merika, mahihina naman sila uminom ng alak, pero marami ang alcoholics. Mga adik sa alak. Sa atin, napakarami ang mga tomador at manginginom, pero di naman sila talaga adik sa alak. Adik sila sa barkadahan, kwentuhan at kasayahan, pero hindi naman sa alak.

Oo, meron din namang ilan na isang bulate na lang ang di nakakapirma, bibigay na. Pero konti lang. Saka bihira lang ang umiinom ng mag-isa. Naubukan mo na bang uminom mag-isa? Para kang kawawang koboy. Itong mga puti, ganun yung iba sa kanila.

Kaya naman isa sa mga pamatay kong linya na garantisading palaging epektib kapag may meeting, seminar o gusto ko lang magpapansin ay galing sa grupong Alcoholics Anonymous. Di ako member nun, pramis. Dedma lang ako sa una, kunyari busy-busyhan ka muna. Yun bang parang wala kang paki sa mga nangyayari sa paligid mo. Pagdating ng turn mo magpakilala, kunyari mabibigla ka lang ng konti. Medyo bibitinin mo din muna ng konti, kapag tahimik na ang lahat at alam mong hinihintay na nila yung sasabihin mo, dun mo ibabanat ang punch line mo..

“My name is Buraot.. and I’m an Alcoholic..”

Ayos na ang buto buto. Tawanan na silang mga anak ng araw. Tuwang tuwa sila sa galak. Ewan ko ba kung bakit lagi epektib yun. Sinubukan ko lang naman nung una, pero lagi epektib. Panigurado, bago matapos ang seminar, vibes na kayo ng boss mong siraulo.

Sempre bonus pa yun sa chikababe na di mapipigil na kumerengkeng sa yo. Pero sempre depende yun kung kekerengkeng ka rin. Ako? Gudboy na ko.