Yeah… yeahhh.. Oo nga. Absent nga ako ng mahigit isang linggo. Eto me dala akong excuse letter galing sa nanay ko.

Kung dati-rati, kinakaya ko pang patawanin ang sarili ko at idaan na lang sa pagba-blog ang mga halu-halong nararamdaman ko, lately di na talaga kinakaya ng powers ko. Grabe sakit. Pero wag ka mag-alala kasi di naman tungkol sa sakit itong post ko. Alam ko naman na sawang sawa ka na sa  mga sakit ko. Ekskyus ko lang yun dahil absent ako.

At dahil matagal akong absent, para na rin akong natulog sa kangkungan… o sa pansitan?

Saan nga ba nanggaling ang mga yan? Ano ba ang kaibahan ng dalawa? Kapag ba nahuli kang natutulog sa kangkungan ibig sabihin vegetarian ka at kapag sa pansitan Intsik ka? Bakit, pareho namang pwedeng lagyan ng sahog yun di ba?

Kung pamimiliin ka, saan mo mas gustong matulog… sa pansitan o sa kangkungan?

Ayon sa aking mga sources, pwede kang matulog sa kangkungan dahil ang kangkong na paborito ni Popeye na may pampalakas ng katawan ay halos walang amoy kaya safe katabi sa pagtulog. Subalit datapwat ngunit kung gusto mo syang tirahin ng fresh ay aabutin ka muna ng halos isang buwan bago mo pwedeng anihin. Kung gusto mo naman ng instantaneous na sustansya ng kangkong, kahit saang palengke meron.

Kung gusto mo namang sa pansitan matulog, medyo me amoy yun. Depende sa sangkap na gagamitin mo. At saka kelangan siguraduhin mo muna kung anong pansit ang gusto mong kaulayaw magdamag. Dahil ang pansit, hindi lang basta pansit. Ito ay mas marami pa sa pinagsama-samang namayapang taghiyawat nina Jograd at Joey De Leon at mas kumplikado pa kaysa sa combined life story nina Mara Clara at Hayden Kho.

Sa dami ng uri ng pansit, kahit ang wikipedia nagrereklamo kung papano ito aayusin. Pansit malabon, pansit luglog, pansit palabok, sotanghon, miki, bihon, lomi at kuuuuung anu anupa.

Katulad ng maraming mga kung anu-anong salita at kasabihan na minana pa natin kay kopong kopong, ang pagtulog sa pansitan at sa kangkungan ang hindi malinaw kung pareho nga ba o may pagkakaiba ang gamit.

Hinagilap ko ang aking mga ninuno. Sabi ng lolo ko… sorry di ko maikakabit yung hyperlink dito nung source kasi wala namang websayt yung lolo ko.. sabi ng lolo ko, “ang natutulog daw sa kangkungan ay yaong mga taong parang nagbubulag-bulagan at hindi pinapansin ang mga nangyayari sa kanyang harapan.” In short, dedma.

At yun naman daw natutulog sa pansitan ay yung mga walaaaaang kamalay-malay sa mga nangyayari sa paligid. Sila ang mga walang kabohay bohay na kahit nakikita na, di pa rin nila namamalayan. As in.. “wa happen?!”

Kung ang natutulog sa kangkungan, alam nila ang nangyayari at wala lang kasing pakialam dahil may sarili silang mundo o nasa isang parallel universe, ang mga natutulog sa pansitan, walang alam. As in tatanga tanga. Nakatunganga. Sabi nga ng Mama, tingala’y nganga.

Ikaw saan mo gusto matulog?